काठमाडौँ । हमासको सशस्त्र शाखाले गाजामा रहेका ४८ इजरायली बन्दीहरूको ‘बिदाई तस्वीर’ सार्वजनिक गर्दा त्यसमा नेपालका विपिन जोशीको फोटो पनि समावेश गरेको छ। हमासले इजरायलको व्यापक स्थलगत तथा हवाई आक्रमणका कारण बन्दीहरूको सुरक्षामा खतरा रहेको दाबी गरेको छ। टाइम्स अफ इजरायलका अनुसार, यो कदमले इजरायली सरकार र बन्दीका परिवारमाथि दबाब सिर्जना गर्ने प्रयास भएको बताइएको छ। अल जजिराका अनुसार, इजरायली सेनाले घेराबन्दी गरिएको क्षेत्रको सबैभन्दा ठूलो सहरलाई ध्वस्त पार्ने र नियन्त्रणमा लिने कारबाही तीव्र बनाइरहेको बेला यो तस्वीर सार्वजनिक गरिएको हो।
शनिबार कस्साम ब्रिगेड्सले अनलाइन पोस्ट गरेको संकलित फोटोमा जीवित र मृत दुवै बन्दीहरूको अनुहार देखाइएको छ, र तिनीहरूलाई सबैलाई ‘रोन अराड’ भनेर क्याप्सन गरिएको छ। रोन अराड सन् १९८६ मा लेबनानमा हराएका इजरायली वायुसेनाका क्याप्टेन हुन्। उनको एफ–फोर फ्यान्टम विमान बम विस्फोटमा क्षतिग्रस्त भएपछि आमल आन्दोलनले उनलाई कब्जा गरी पछि हिज्बुल्लाहलाई सुम्पेको थियो। अराडको मृत्यु भएको विश्वास गरिए पनि उनको अवस्थाबारे ठोस प्रमाण छैन। हमासले तस्वीरसँगै, “नेतान्याहूको अस्वीकार र जामिरको आत्मसमर्पणका कारण, गाजा सिटीमा सैन्य कारबाही सुरु हुने बेलामा यो बिदाई तस्वीर हो” भन्ने टिप्पणी जोडेको छ। यसले गाजामा युद्ध अन्त्य गर्न कुनै सम्झौता नगर्ने नेतान्याहूको अडान र सेनाप्रमुख एयाल जामिरको आपत्तिबीच पनि आक्रमण विस्तार गर्ने निर्णयलाई संकेत गर्छ।
इजरायली अधिकारीहरूले गाजामा अझै करिब २० बन्दी जीवित रहेको विश्वास व्यक्त गरेका छन्। तर अमेरिकी राष्ट्रपति डोनाल्ड ट्रम्पले यो संख्या २० भन्दा कम हुन सक्ने बताएका छन्। दुवैले सबै बन्दीलाई फर्काउने र हमासलाई ध्वस्त पार्ने प्रतिबद्धता दोहोर्याएका छन्। हमासले पटक–पटक इजरायली आक्रमण तीव्र भएमा बन्दीहरूको जीवन जोखिममा पर्ने चेतावनी दिँदै आएको छ। समूहले केही बन्दी पहिले नै इजरायली बम आक्रमणमा मारिएको दाबीसमेत गरेको छ र उनीहरू गाजाका विभिन्न टोल–छिमेकमा छरिएर राखिएका छन् भनेको छ।
यसैबीच, लाखौं इजरायली तेल अभिभ र अन्य शहरमा सडक प्रदर्शन गर्दै सरकारलाई युद्ध रोक्न र सबै बन्दी फर्काउन तत्काल सम्झौता गर्न दबाब दिइरहेका छन्। यो घटना अघि, हमासले पछिल्ला केही हप्तामा दुई–दुई पटक इजरायली बन्दीहरूको भिडियो सार्वजनिक गरिसकेको थियो, जसले बन्दीका परिवार, इजरायली सरकार, अमेरिकी अधिकारी र इजरायलका सहयोगीहरूबीच आक्रोश पैदा गरेको थियो।
सम्बन्धित खवर
