काठमाडौँ । पाकिस्तान र अफगानिस्तानको तालिबान फोर्सेजबीच पुनः झडप भएको छ, जसपछि दुवै देशहरूले एक–अर्कामाथि संघर्ष–विराम उल्लंघनको आरोप लगाएका छन्।
बढ्दो तनावका कारण अफगानिस्तानको स्पिन बोल्दक शहरका स्थानीय नागरिकहरूले राति आफ्नो घर छोड्नुपरेको बीबीसीले जनाएको छ। कन्धार शहरको एक अस्पताल स्रोतले बीबीसीलाई स्थानीय अस्पतालमा चार जनाको शव ल्याइएको जानकारी दिएको छ।
दुवै पक्षले गएराति गोलीबारी भएको पुष्टि गरेका छन्, र चार घण्टासम्म चलेको संघर्षको कारण दुवै मुलुकले एक–अर्कामाथि दोष लगाएका छन्।
पाकिस्तानका प्रधानमन्त्री शहबाज शरीफका प्रवक्ता मुशर्रफ जैदीले तालिबानको गोलीबारीलाई बिना कुनै कारण भएको आरोप लगाएका छन्, जबकि तालिबानका प्रवक्ताले पाकिस्तानको आक्रमणपछि आफूहरू जवाफ दिन बाध्य भएको बताएका छन्।
झडपका कारण पाकिस्तानको तर्फबाट कुनै क्षतिको विवरण प्राप्त हुन सकेको छैन। केही महिनायता, दुवै देशबीच बारम्बार छिटपुट लडाई जारी रहेको छ। अफगानिस्तानको तालिबान सरकारले पाकिस्तानमाथि देशभित्र प्रवेश गरेर हवाई आक्रमण गरेको आरोप पनि लगाएको थियो।
